Amigos da Terra e o concello de A Pobra de Trives realizan unha presentación do Servizo de Voluntariado Europeo, para informar das súas vantaxes á mocidade e entidades da comarca, o martes 27 ás 19:00 no salón de actos do Concello.
Amigos da Terra comeza un proxecto de promoción entre a mocidade galega do Servizo Voluntario Europeo (SVE). Este programa fomenta a mobilidade dos mozos e mozas europeas para que coñezan as diferentes realidades doutros países participando en iniciativas sociais, artísticas, culturais, do patrimonio ou medio ambiente. Este voluntariado ao ter lugar no estranxeiro, amplifica as súas vantaxes, xa que non só se trata de desfrutar dunha experiencia persoal única se non que se adquiren coñecementos e se fortalecen habilidades craves que son altamente valoradas polas empresas. Sen embargo, sabemos que son practicamente descoñecidos entre a mocidade e incluso entre as entidades, xa que en Galicia apenas existen organizacións tanto de envío como de acollida.
O obxectivo non é só difundir o SVE e as súas vantaxes entre a mocidade galega, se non intentar que se sumen máis entidades para enviar e acoller voluntariado de outras nacionalidades.
Nestas charlas levarase a cabo un primeiro achegamento ao SVE, as súas vantaxes, os requisitos de participación, a duración, as actividades que se poden levar a cabo e as condicións de financiamento. Tamén se contará ca testemuña de Kelli Goris, de Holanda, que achegará a súa vivencia como voluntaria na asociación. Nesta xornada tamén se resolverán todas as dúbidas das persoas asistentes sobre este programa.